ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន មានប្រសាសន៍ថា សម្ដេចនឹងបំពាក់មេដាយមាសជូនក្រុមប្រតិបត្តិការជួយសង្គ្រោះជនរងគ្រោះក្នុងឧបទ្ទវហេតុបាក់អគារកម្ពស់ ៧ជាន់ ស្ថិតក្នុងភូមិ៣ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីវេលាទាបភ្លឺព្រឹកថ្ងៃទី២២ ខែមិថុនា ឆ្នាំ២០១៩ កន្លងទៅនោះ។
នៅលើបណ្ដាញទំនាក់ទំនងសង្គមហ្វេសប៊ុកនៅរាត្រីថ្ងៃអង្គារ ៨រោច ខែជេស្ឋ ឆ្នាំកុរ ឯកស័ក ព.ស២៥៦៣ត្រូវនឹងថ្ងៃទី២៥ ខែមិថុនា ឆ្នាំ២០១៩ សម្ដេចតេជោនាយករដ្ឋមន្ត្រីបាន សរសេរថា អាស្រ័យដោយក្តីអាណិតស្រឡាញ់ចំពោះជនរងគ្រោះ សប្បុរសជននៅបន្តជួយ ឧបត្ថម្ភដែលធ្វើឱ្យចំនួនទឹកប្រាក់កើនឡើងពី ២.១៩៨.៤០០ ដុល្លារអាម៉េរិក ដល់ ២.៣៦៨.៤០០ដុល្លារអាម៉េរិក ។ ដោយដក៣០ម៉ឺនដុល្លារអាម៉េរិកចែកជូនអ្នកត្រូវរបួស ថវិកា នៅសល់សម្រាប់ចែកជូនក្រុមគ្រួសារអ្នកស្លាប់កើនពីចំនួន ១.៨៩៨.៤០០ដុល្លារអាម៉េរិក ដល់ ២.០៦៨.៤០០ដុល្លារអាម៉េរិក ដែលធ្វើឱ្យគ្រួសារសពម្នាក់ៗទទួលបានកើនពី ៦៧.៨០០ដុល្លារ អាម៉េរិក ដល់ ៧៣.៨៧០ដុល្លារអាម៉េរិក។ យើងនៅតែបន្តទទួលជំនួយឧបត្ថម្ភនេះតទៅទៀត ដែលក្នុងឱកាសនេះ ខ្ញុំសូមថ្លែងអំណរគុណយ៉ាងជ្រាលជ្រៅចំពោះការជួយឧបត្ថម្ភដ៏ថ្លៃថ្លា នេះ។
សម្ដេចបានបន្តថា ឯកឧត្តម សេង ទៀង នឹងចាត់ចែងបញ្ជូនថវិកានេះទៅកាន់គ្រួសារ សព នៅពេលបិទបញ្ចប់ការទទួលជំនួយតាមរយៈធនាគារ។ ខ្ញុំក៏សុំបញ្ជាក់ជូនផងដែរថា យប់ម៉ិញនេះនៅមុនម៉ោង១២យប់ខ្ញុំបានឱ្យឯកឧត្តម សេង ទៀង យកថវិកាខ្ញុំទៅចែកជូន កម្លាំងចូលរួមប្រត្តិបត្តិការចំនួន ១.៤៨៧នាក់ក្នងនោះនារី៣៥នាក់ ដោយម្នាក់ៗជាបុរសទទួល បាន ១០០ដុល្លារអាម៉េរិក ជានារីទទួលបាន ២០០ដុល្លារអាម៉េរិក អស់ទឹកប្រាក់ ១៥២.២០០ ដុល្លារអាម៉េរិក។ ខ្ញុំនឹងបំពាក់មេដាយមាសជូន ក្រុមជួយសង្រ្គាះដើម្បីឆ្លើយតបនិងការខិតខំ របស់បងប្អូនទាំងអស់រាប់ទាំងផ្នែកឯកជនផងដែរ។ ថវិកាដែលទទួលបានពីសប្បុរសជនប្រើ ប្រាស់សម្រាប់តែអ្នកស្លាប់ និងរបួសប៉ុណ្ណោះ។
គួរបញ្ជាក់ដែរថា រដ្ឋបាលខេត្តព្រះសីហនុបានចេញសេចក្តីជូនដំណឹងអំពីប្រតិបត្តិការ រុករកជនរងគ្រោះ ក្នុងឧបទ្ទវហេតុរលំបាក់អគារកម្ពស់៧ជាន់ នៅខេត្តព្រះសីហនុ បានបិទបញ្ចប់នៅវេលាម៉ោង៧ និង៣០នាទីយប់ថ្ងៃទី២៤ ខែមិថុនា ឆ្នាំ២០១៩ បន្ទាប់ពីបើកប្រតិបត្តិ ការរុករក និងសង្រ្គោះអស់រយៈពេល២ថ្ងៃកន្លះ។ តុល្យការជនរងគ្រោះដែលក្រុមការងារបានជួយសង្រ្គោះយកចេញពីគំនរអគារបាក់បែក មានចំនួនសរុបចំនួន៥៤នាក់ ក្នុងនោះស្លាប់ចំនួន២៨នាក់ ស្រី០៤នាក់ និងរងរបួសចំនួន២៦នាក់ ស្រី០២នាក់៕
