ភ្នំពេញ ថ្ងៃទី០៩ ខែធ្នូ ឆ្នាំ២០១៦ –សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានស្វាគមន៍ចំពោះការផ្ដល់ប្រព័ន្ធអ៊ីនធឺណែតល្បឿនលឿនរបស់ក្រុមហ៊ុន Huawei នៅកម្ពុជា ដែលសម្ដេចបានចាត់ទុកថានេះគឺជាការរួមចំណែកក្នុងការអនុវត្តគោលនយោបាយរបស់ រាជរដ្ឋាភិបាល ក៏ដូចជាការប្រើប្រាស់របស់ប្រជាពលរដ្ឋលើគ្រប់វិស័យ ក្នុងការប្រកួតប្រជែងឱ្យទទួលបាន ជោគជ័យ។
ឯកឧត្ដម អ៊ាង សុផល្លែត ជំនួយការសម្ដេចតេជោ បានថ្លែងដូច្នេះប្រាប់អ្នកយកពត៌មាន បន្ទាប់ពីសម្ដេច តេជោនាយករដ្ឋមន្ត្រីបានអនុញ្ញាតឱ្យ លោក Sun Fuyou ប្រធានទទួលបន្ទុកតំបន់អាស៊ីអាគ្នេយ៍របស់ក្រុម ហ៊ុនHuawei ចូលជួបសម្ដែងការគួរសមនារសៀលថ្ងៃទី០៨ ខែធ្នូ ឆ្នាំ២០១៦ នៅវិមានសន្តិភាព។
លោក Sun បានជម្រាបជូនសម្ដេចតេជោនាយករដ្ឋមន្ត្រីថា ពាក់ព័ន្ធនិងការខ្វះខាតអណ្ដូងទឹកចំនួន៥០អណ្ដូង ដែលជាតម្រូវការរបស់ព្រះរាជាណាចក្រកម្ពុជា ហើយបានពិភាក្សាគ្នានាពេលកន្លងមកនោះ បច្ចុប្បន្ននេះ ក្រុមហ៊ុនកំពុងតែធ្វើការជាមួយក្រសួងអភិវឌ្ឍន៍ជនបទ ដែលនៅខែមករាឆ្នាំ២០១៧ខាងមុខនេះ អណ្ដូងទឹក ចំនួន៥០ នឹងចាប់ផ្ដើមជីកជូនដល់ប្រជាពលរដ្ឋប្រើប្រាស់។ លោកបានបន្តថា ចំពោះបច្ចុប្បន្នភាពរបស់ សិស្សចំនួន១១នាក់ដែលកំពុងតែទទួលការបណ្ដុះបណ្ដាល នៅទីក្រុងប៉េកាំងសាធារណរដ្ឋប្រជាមានិតចិន ជុំវិញបញ្ហា IT ហើយសិស្សជំនាន់ទី២ និងទី៣ នឹងត្រូវជ្រើសរើសដោយក្រុមហ៊ុន និងដោយ ស.ស.យ.ក ដើម្បីទៅបណ្ដុះបណ្ដាលជាបន្តទៀតនៅឆ្នាំ២០១៧ និង២០១៨ខាងមុខនេះ។លោកក៏បានជម្រាបជូនសម្ដេច តេជោផងដែរ អំពីបញ្ហាការប្រើប្រាស់អ៊ីនធឺណែតល្បឿនលឿននៅព្រះរាជាណាចក្រកម្ពុជា ដែលជាការចាំ បាច់ដើម្បីជំរុញ ទាំងកំណើនសេដ្ឋកិច្ច ចំណេះដឹង និងអ្វីផ្សេងៗទៀតដើម្បីដោះស្រាយបញ្ហាសង្គមផងដែរ។ជាមួយគ្នានោះលោកក៏បានជូនសម្ដេច នូវប្រព័ន្ធអ៊ីនធឺណែតល្បឿនលឿនចំនួន ១០០០កំប្លេ ដែលមាន ទឹកប្រាក់ស្មើនឹង ៤លានដុល្លារ អាម៉េរិក។ ជាការឆ្លើយតបសម្ដេចតេជោនាយករដ្ឋមន្ត្រី បានថ្លែងអំណរគុណ ជូនចំពោះការឆ្លើយតប ទាំងការផ្ដល់នូវការជីកអណ្ដូង ការបណ្ដុះបណ្ដាលធនធានមនុស្សលើវិស័យ IT និង ការផ្ដល់ជូននូវប្រព័ន្ធអ៊ីនធឺណែតល្បឿនលឿនចំនួន ១០០០កំប្លេ ហើយក៏បានស្នើសុំឱ្យប្រគល់ជូន ឯកឧត្ដម រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ដើម្បីធ្វើការពិនិត្យថាតើប្រព័ន្ធអ៊ីនធឺណែតល្បឿនលឿនទាំង ១០០០កំប្លេនោះ ត្រូវដាក់នៅទីណាខ្លះ។សម្ដេចបានមានប្រសាសន៍ថា កម្ពុជាមិនត្រឹមតែចង់បានរដ្ឋាភិបាល អេឡិចត្រូនិកនេះទេ គឺចង់បានទាំងប្រជាជនអេឡិចត្រូនិក ហើយដើម្បីធ្វើឱ្យបានការងារនេះ គឺត្រូវធ្វើយ៉ាង ណា យើងត្រូវមានប្រព័ន្ធអ៊ីនធឺណែតល្បឿនលឿន ដូច្នេះស្នើឱ្យក្រុមហ៊ុន Huawei ពិភាក្សាបន្ត ជាមួយរដ្ឋមន្ត្រីក្រសួងប្រៃសណីយ៍ និងទូរគមនាគមន៍ ធ្វើយ៉ាងណាឱ្យកម្ពុជាមានអ៊ីនធឺណែតល្បឿនលឿន ដើម្បីជាការជំរុញ គោលនយោបាយរបស់រាជរដ្ឋាភិបាលកម្ពុជា ក៏ដូចជាជំរុញឱ្យប្រជាពលរដ្ឋកម្ពុជាដែលកំពុងតែប្រើប្រាស់ អ៊ីនធឺណែតច្រើន មានលទ្ធភាពគ្រប់គ្រាន់ក្នុងការប្រកួតប្រជែងក្នុងវិស័យសេដ្ឋកិច្ច សង្គមកិច្ច និងវិស័យផ្សេងៗ ទៀត៕
