កំពង់ឆ្នាំងៈ នៅថ្ងៃទី១៤ ខែតុលា ឆ្នាំ២០១៩ ឯកឧត្តមឡុង ឈុនឡៃ ប្រធានក្រុមប្រឹក្សាខេត្តនិង
ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង និងលោកជំទាវ រួមដំណើរដោយ ឯកឧត្តមលោកជំទាវសមាជិកក្រុមប្រឹក្សាខេត្ត ឯកឧត្តមលោកជំទាវ អភិបាលរងខេត្ត ថ្នាក់ដឹកនាំមន្ទីរអង្គភាពជុំវិញខេត្តបានអញ្ជើញសួរសុខទុក្ខនិងចូលរួមរំលែកទុក្ខជាមួយគ្រួសារសព ឯកឧត្តម ម៉ាត់ ម៉ូត សមាជិកក្រុមប្រឹក្សាខេត្តនិង ជាអនុប្រធានគណៈកម្មាធិការគណបក្សប្រជាជនកម្ពុជាខេត្តកំពង់ឆ្នាំងនៅគេហដ្ឋានរបស់ឯកឧត្តមនៅទីរួមស្រុកកំពង់ត្រឡាច។
តាមរបាយការណ៍របស់ ឯកឧត្តម នន់ យ៉ៅ បានអោយដឹងថាៈ ឯកឧត្តម ម៉ាត់ ម៉ូត បានទទួលមរណៈភាពដោយរោគាពាធ កាលពីវេលាម៉ោង១៥និង១០នាទីល្ថាចថ្ងៃទី១៣ ខែតុលា ឆ្នាំ២០១៩ ក្នុងជន្មាយុ៧៥ ឆ្នាំ។
មានប្រសាសន៍នៅក្នុងឱកាសនោះ ឯកឧត្តម ឈួរ ច័ន្ទឌឿន បានសំដែងនូវការចូលរួមរំលែកទុក្ខយ៉ាងក្រៀមក្រំ និង ក្តុកក្តួលក្រៃលែង ជាមួយ ជាភរិយា កូន និង ក្រុមគ្រួសារ របស់ ឯកឧត្តម ម៉ាត់ ម៉ូត ។
ឯកឧត្តម ឈួរ ច័ន្ទឌឿន បានមានប្រសាសន៍ទៀតថា មរណៈភាពរបស់ ឯកឧត្តម ម៉ាត់ ម៉ូត នាពេលនេះ គឺជាការបាត់បង់ ស្វាមី ឪពុក ជីតាជាទីគោរពស្រឡាញ់ដ៏ជ្រាលជ្រៅបំផុត ប្រកបដោយព្រហ្មវិហារធម៌ ដោយកន្លងមក ឯកឧត្តម តែងតែយកអស់នូវកម្លាំងកាយចិត្ត ប្រាជ្ញាស្មារតី ចិញ្ចឹមបីបាច់ថែរក្សាក្រុមគ្រួសារ និង ធ្វើអោយក្រុមគ្រួសារ រស់នៅ ប្រកបដោយក្តីរីករាយ និង សុភមង្គល ។ ការបាត់បង់ឯកឧត្តម ម៉ាត់ ម៉ូត ជាការបាត់បង់ថ្នាក់ដឹកនាំ ដ៏ល្អម្នាក់ របស់ខេត្តកំពង់ឆ្នាំង ដែលពោរពេញដោយសមត្ថភាព ទឹកចិត្តល្អ យោគយល់ អធ្យាស្រ័យ ហើយ ទទួលបានការគោរពស្រឡាញ់ ពីថ្នាក់ដឹកនាំ មន្រ្តីរាជការ ទូទាំងខេត្ត។ ទោះបីឯកឧត្តម ម៉ាត់ ម៉ូត បានឃ្លាតឆ្ងាយទៅ ក៏ពិតមែន ប៉ុន្តែបាន បន្យល់ទុក នូវបទពិសោធន៍ល្អៗ សម្រាប់មន្រ្តីរាជការ ក្នុងការអនុវត្តបន្តផងដែរ។
ដើម្បីចូលរួមរំលែកទុក្ខនាឱកាសនោះឯកឧត្តមឡុង ឈុនឡៃ និង ឯកឧត្តម ឈួរ ច័ន្ទឌឿន បាននាំយកនូវថវិកាចំនួន ១២.៧៨០.០០០រៀល និង ៧៤០ដុល្លាដែលជាថវិកា របស់រដ្ឋបាលខេត្ត សមាជិកក្រុមប្រឹក្សាខេត្ត និង ថ្នាក់ដឹកនាំមន្ទីរអង្គភាពជុំវិញខេត្ត ដើម្បីឧបត្ថម្ភដល់ក្រុមគ្រួសារសពផងដែរ ៕
