ឯកឧត្តម សុខ ឥសាន៖ CPP ស្វាគមន៍CNRP លុប​ពាក្យ ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្ត្រ​


ភ្នំពេញ​: គណបក្ស​ប្រជាជន​កម្ពុជា បាន​ស្វាគមន៍​ចំពោះ គោលជំហរ​របស់ គណបក្ស​សង្គ្រោះ​ជាតិ ដែល​បាន​លុបចោល នូវ​គោលនយោបាយ​អាទិភាព “​ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្ត្រ​”​។ ប៉ុន្តែ​គណបក្ស​ប្រជាជន​កម្ពុជា ឲ្យ​គណបក្ស​សង្គ្រោះ​ជាតិ ធ្វើការ​ប្រកាស​ជា​ផ្លូវការ បើ​គ្រាន់តែ​ថា តាម​រលកធាតុអាកាស គឺ​នៅ​មិនទាន់​ជឿ ១០០ ភាគរយ​ទេ​។ គណបក្ស​ប្រជាជន​កម្ពុជា នៅតែ​រក្សា​ជំហរ ប្តឹងទៅ​តុលាការ​ដដែល​។​

ឯកឧត្តម សុខ ឥសាន អ្នកនាំពាក្យ គណបក្ស​ប្រជាជន​កម្ពុជា បាន​មានប្រសាសន៍ថា លោក​ស្វាគមន៍ ចំពោះ​គោលជំហរ របស់​គណបក្ស​សង្គ្រោះ​ជាតិ ដែល​បាន​លុបចោល នូវ​គោលនយោបាយ ក៏ប៉ុន្តែ​វា​គ្រាន់តែ​ជា​ពាក្យសំដី មិនទាន់​គ្រប់គ្រាន់​នៅឡើយ​ទេ ទាល់តែ​ប្រកាស​លុបចោល នូវ​គោលនយោបាយ​៥​ចំណុច មួយ​ចំណុច​នឹងត្រូវ​លុបចោល ហើយ​នៅ​ទុក​តែ ៤ ចំណុច ទើប​វា​ជាក់ច្បាស់​។ បើ​គាត់​គ្រាន់តែ​ថា បង្ហើរ​តាម​រលកធាតុអាកាស គឺ​មិនទាន់​ជឿ ១០០ ភាគរយ​ទេ​។​

​ អ្នកនាំពាក្យ គណបក្ស​ប្រជាជន​កម្ពុជា បាន​បញ្ជាក់ថា បើសិនជា​គណបក្ស​សង្គ្រោះ​ជាតិ មិន​ផ្លាស់ប្តូរ​ខ្លឹមសារ “​ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្ត្រ​” ជា​ផ្លូវការ​នោះទេ គឺ​គណបក្ស​ប្រជាជន​កម្ពុជា នៅតែ​រក្សា​ជំហរ ក្នុងការ​ប្តឹងទៅ តុលាការ​ដដែល​។ “​ជា​ការពិតហើយ គឺ​យើង​រក្សា​សិទ្ធិ​បញ្ហា​នឹង តែ​ឥឡូវនេះ គឺ​ឥឡូវនេះ​គាត់​ដាក់ “​ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្ត្រ​” ប៉ុន្តែ​យើង​មិនទាន់​ធ្វើ​ករណី​នឹង​ទេ ក៏ប៉ុន្តែ​គាត់​ដក​គ្នា​គាត់ រួចទៅហើយ ដក​មួយចំនួន​តាម​ឃុំ​ទៅហើយ អា​នឹង​ដោយសារ​អី គឺថា​ការដាក់​គោលនយោបាយ វា​មិន​ត្រឹមត្រូវ ការនិយាយ​ផ្សេង ទៅធ្វើ​ផ្សេង​”​។​

​ឯកឧត្តម សុខ ឥសាន បាន​បន្តថា គណបក្ស​ប្រជាជន​កម្ពុជា ស្វាគមន៍​ចំពោះ​ជំហរ ដែលមាន​ការប្រែប្រួល គឺ​មិន​ចង់​មាន​បញ្ហា​ទេ សូម​ឲ្យ​គណបក្ស​សង្គ្រោះ​ជាតិ អនុវត្ត​ទ្រឹស្តី​របស់ខ្លួន ឲ្យ​ចេញ​ជាការ​ជាក់ស្តែង ទើបបាន​អាច​ជឿទុកចិត្ត​។ ហើយ​ចំពោះ​ការងារ ដែល​ត្រៀម​ប្តឹង គឺ​ត្រូវ​បញ្ចប់​៕