កម្ពុជាកំពុងរៀបចំស្ដង់ដារ៣ បន្ថែមទៀត សម្រាប់រាជធានី ខេត្ត ប្រកួតដណ្ដើមយកពានរង្វាន់ ។ ស្ដង់ដារទាំង៣ គឺៈ ការរៀបចំស្តង់ដាបង្គន់អនាម័យសាធារណៈ,… ស្ដង់ដាផ្សារស្អាត និងស្ដង់ដាសាលាស្អាត ។ កិច្ចប្រជុំដាក់ស្តង់ដានេះ បានធ្វើនៅព្រឹកថ្ងៃទី៣ ខែកុម្ភៈ ក្រោមអធិបតីភាព ឯកឧត្តមរដ្ឋមន្ត្រីក្រសួងទេសចរណ៍ ថោង ខុន ។ អភិបាលរាជធានីភ្នំពេញ ក៍បានអញ្ជើញចូលរួមក្នុងកិច្ចប្រជុំនេះផងដែរ ។
ស្តង់ដាបង្គន់ គឺជាបង្គន់សាធារណៈ ដែលដាក់អោយប្រើប្រាស់នៅតាមទីសាធារណៈ ដូចជានៅសួនច្បារ,… តាមដងផ្លូវ,… តាមអគារសាធារណៈ,… តាមផ្សារទំនើប,… ផ្សារឯកជន,… ផ្សាររដ្ឋ,… តាមរមណីដ្ឋានទេសចរណ៍ និងនៅតាមមជ្ឈមណ្ឌលសាធារណៈមួយចំនួនផ្សេងៗទៀត ។ លើសពីនេះ បង្គន់សាធារណៈ នឹងត្រូវបានរៀបចំឡើង នៅតាមទីប្រជុំជននានាទូទាំងប្រទេស និងប្រកបដោយអនាម័យ និងបរិស្ថានស្អាត ។
ស្តង់ដា “ផ្សារស្អាត” គឺសំដៅលើការយកចិត្តទុកដាក់ ទៅលើការថែរក្សាបរិស្ថាន សណ្តាប់ធ្នាប់ អនាម័យ សុវត្ថិភាពចំណីអាហារ និងគិតគូរពីផលប៉ះពាល់ដល់បរិស្ថាននៃបញ្ហាថង់ប្លាស្ទីក និងជួយបណ្តុះ គំនិតអាជីវករ នៅតាមផ្សារទាំងអស់ ក្នុងការចូលរួមលើកកម្ពស់ភាពស្អាត នៅតាមបណ្តាផ្សារ ក៏ដូចជាប្រទេសទាំងមូល ។
ក្នុងកិច្ចប្រជុំនោះ ក៏បានលើកពីស្តង់ដា “សាលាស្អាត” ផងដែរ ។ តាមកិច្ចពិភាក្សា ស្តង់ដាស្អាតទាំងបី នឹងមានធ្វើការប្រឡងប្រណាំងជារៀងរាល់ឆ្នាំ ។