រដ្ឋមន្រ្ដីក្រសួងឧស្សាហកម្ម បើកកិច្ចប្រជុំ​លើកទី​២​ក្រុមប្រឹក្សា​ជាតិ​ វិទ្យាសាស្ត្រ​ បច្ចេកវិទ្យា​ និងនវានុវត្តន៍​


ឯកឧត្តមកិត្តិសេដ្ឋាបណ្ឌិត​ ចម​ ប្រសិទ្ធ​ ទេសរដ្ឋមន្រ្តី​ រដ្ឋមន្រ្តី​ក្រសួង​ឧស្សាហកម្ម​ វិទ្យា​សាស្ត្រ​ បច្ចេកវិទ្យា​ និងនវានុវត្តន៍​បានអញ្ជើញបើកកិច្ចប្រជុំ​លើកទី​២ក្រុមប្រឹក្សា​ជាតិ ​វិទ្យាសាស្ត្រ​ បច្ចេកវិទ្យា ​និងនវានុវត្តន៍​ (ក.ជ.វ.​ប.ន) នៅទីស្តីការក្រសួង​ តាមប្រព័ន្ធ​អនឡាញ​ នាព្រឹក​ថ្ងៃ​ទី​ ១២​ ខែ​មករា​ ឆ្នាំ​២០២២។ ឯកឧត្តមកិត្តិសេដ្ឋាបណ្ឌិត​ ទេសរដ្ឋមន្រ្តី​ ចម​ ប្រសិទ្ធ​ បានវាយតម្លៃខ្ពស់ ​និង​កោត សរសើរ​ចំពោះការចូលរួម​និងសមិទ្ធផល​សម្រេច​បាន​របស់​ក្រុមប្រឹក្សា​ ក.ជ.វ.​ប.ន​ នាពេល កន្លងមក​ ហើយនេះជាលើក​ទី២ ដែលកិច្ចប្រជុំ ក.ជ.វ.ប.ន. ត្រូវបានរៀបចំឡើង បន្ទាប់ពី កិច្ចប្រជុំលើកទី១ ដែលបានប្រព្រឹត្តិទៅកាលពីថ្ងៃទី០៨ ខែកក្កដា ឆ្នាំ២០២១​កន្លង​ទៅ​។

ឯកឧត្តមកិត្តិសេដ្ឋាបណ្ឌិត​បានបន្ត​ថា​ បន្ទាប់ពីរាជរដ្ឋាភិ​បាលកម្ពុជា ក្រោមការ​ដឹក​នាំ​របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃ​ព្រះរាជា​ណា​ចក្រ​កម្ពុជា និងជាប្រធានកិត្តិយសរបស់ ក.ជ.វ.ប.ន. បានចាប់យក​វិស័យ វ.ប.ន. ជាមូល​ដ្ឋាន​គ្រឹះដ៏ សំខាន់សម្រាប់បង្កលក្ខណៈឱ្យប្រទេសកម្ពុជាឈានទៅសម្រេចបាន​នូវចក្ខុ​វិស័យ​ប្រកប​​ដោយមហិច្ឆតារបស់ខ្លួនក្នុងការប្រែ​ក្លាយទៅជាប្រទេសមានចំណូលមធ្យមកម្រិត​ខ្ពស់​នៅ ឆ្នាំ២០៣០ និងជាប្រទេសមានចំណូលកម្រិតខ្ពស់នៅឆ្នាំ២០៥០​។

ចំពោះគោល​នយោ បាយជាតិស្តីពី វិទ្យាសាស្ត្រ​ បច្ចេកវិទ្យា​ និងនវានុវត្តន៍​ (វ.ប.ន.)​ឆ្នាំ២០២០-២០៣០ ត្រូវ​បានដាក់ឱ្យអនុវត្តន៍​ និងផែនទីបង្ហាញផ្លូវ វ.ប.ន. កម្ពុជា ២០៣០​ ត្រូវបានសម្រេច​អនុម័ត​ដោយ ក.ជ.វ.ប.ន.នៅក្នុងកិច្ចប្រជុំលើកទី១ ។ សូមរម្លឹកផងដែរថា ផែនទីបង្ហាញផ្លូវ វិទ្យាសាស្ត្រ​ បច្ចេកវិទ្យា​ និងនវានុវត្តន៍ កម្ពុជា ២០៣០ មានសសរស្តម្ភចំនួន៥ ដែលរួមមាន៖ ១-អភិបាលកិច្ច, ២-ការអបរំ, ៣-ការស្រាវ​ជ្រាវ និងអភិវឌ្ឍន៍, ៤-កិច្ចសហការ, និង ៥-ប្រព័ន្ធអេកូឡូស៊ី។ ផែនទី​បង្ហាញផ្លូវនេះ គឺជា​ត្រីវិស័យដ៏ចាំបាច់សម្រាប់ក្រសួង-ស្ថាប័នពាក់ព័ន្ធក្នុងការអនុវត្តភារកិច្ចរបស់ខ្លួន ​ក្រោម​កិច្ច​សម្រសម្រួលរបស់ ក្រុមប្រឹក្សា​ជាតិ ​វិទ្យាសាស្ត្រ​ បច្ចេកវិទ្យា ​និងនវានុវត្តន៍​ (ក.ជ.វ.​ប.ន) ដែលផែនការអនុវត្តត្រូវបានដាក់បញ្ចូលក្នុងរបៀបវារៈទី៥​ នៃកិច្ចប្រជុំក្នុងថ្ងៃនេះ។

ឯកឧត្តមកិត្តិសេដ្ឋាបណ្ឌិត​ ចម​ ប្រសិទ្ធ បានចាត់ទុកសមិទ្ធផលថ្មីៗក្នុងវិស័យ វិទ្យា​សាស្ត្រ​ បច្ចេកវិទ្យា​ និងនវានុវត្តន៍​ (វ.ប.ន.)​ បាននិងកំពុងដើរតួនាទីជាស្នូលដល់វឌ្ឍនភាព វិទ្យាសាស្ត្រ​ បច្ចេកវិទ្យា​ និងនវានុវត្តន៍កម្ពុជាដែលរួមមាន៖ របៀបវារៈស្រាវជ្រាវជាតិ, កម្មវីធី​ GO-SPIN​ (Global Observatory of Science, Technology and Innovation Policy Instruments), ក្របខ័ណ្ឌគោល​នយោ​បាយសេដ្ឋកិច្ច និងសង្គមឌីជីថលកម្ពុជា ២០២១-​២០៣៥, ផែនទីបង្ហាញផ្លូវ បច្ចេកវិទ្យាអបរំ និងបច្ចេកវិទ្យាសុខាភិបាល និងបច្ចេកវិទ្យា​កសិកម្ម។ ឯកឧត្តមកិត្តិសេដ្ឋាបណ្ឌិត​បានលើកឡើងលើទស្សនៈវិស័យក្នុង​ការ​ដឹកនាំ​សម្របសម្រួលក្នុងវិស័យស្ដីពី វិទ្យាសាស្ត្រ​ បច្ចេកវិទ្យា​ និងនវានុវត្តន៍កម្ពុជាលើ​កិច្ចការ​មួយចំនួនផ្សេងទៀតសម្រាប់ជំរុញការអភិវឌ្ឍប្រព័ន្ធអេកូនវានុវត្តន៍ជាតិស្របតាមគោលនយោបាយ​ ជាតិស្តីពី វិទ្យាសាស្ត្រ​ បច្ចេកវិទ្យា​ និងនវានុវត្តន៍ឆ្នាំ២០២០-២០៣០ និងការ​ចង្អុល​​បង្ហាញរបស់ផែនទីបង្ហាញផ្លូវ វ.ប.ន. កម្ពុជា ២០៣០។

លើសពីនេះទៀត សម្រាប់​គំនិត​​ផ្តួចផ្តើម​ទាំងនោះរួមមាន ការរៀបចំបង្កើតបណ្ឌិត្យសភាវិទ្យាសាស្ត្រ, ការរៀបចំ​គោលនយោ​បាយ​នវានុវត្តន៍ឧស្សាហកម្មកម្ពុជា, ការអង្កេតថ្នាក់ជាតិស្តីពី វ.ប.ន., ការរៀបចំ​បង្កើតសួន វ.ប.ន.​ , ការពង្រឹងនិងលើកតម្កើងកម្មវិធី STEM (Science Technology Engineering Mathematics) ក្នុងចំណោមយុវជន, និងការទាក់ទាញបុគ្គលដែលមាន ទេព្យ​កោសល្យ​ពីបរទេស (Talent Grant In) ជាដើម។ ឯកឧត្តមកិត្តិសេដ្ឋាបណ្ឌិត​បានបង្ហាញនូវក្តីសង្ឈឹមដ៏មុតមាំចំពោះការបង្កើនកិច្ច​ស​ហ​ការ​ក្នុងវិស័យ វ.ប.ន. និងការពង្រឹងសាម្គីភាពអនុវត្តន៍ការងារដើម្បីប្រយោជន៍ជាតិជារួម​ និង​លើក​ទឹកចិត្តឱ្យមានការចូលរួមផ្តល់ទស្សនទាននានាក្នុងកិច្ចប្រជុំនេះ ដើម្បីជាធាតុ​ចូល​សម្រាប់កិច្ចអភិវឌ្ឍន៍វិស័យ វិទ្យាសាស្ត្រ​ បច្ចេកវិទ្យា​ និងនវានុវត្តន៍កម្ពុជា៕