ឯកឧត្តមបណ្ឌិត ម៉ៅ ធនិន អភិបាលខេត្ត បានលើកឡើងថា ក្នុងនាមគ្រួសារតែមួយ ជនជាតិតែមួយ ឈាមជ័រតែមួយ ពេលដែលយើងទទួលបានឋានៈ តួនាទី ក្នុងការដឹកនាំនៅតាមមូលដ្ឋាន យើងមិនត្រូវប្រព្រឹត្តអំពើមិនល្អ អំពើដែលពលរដ្ឋខ្លាចរអា កុំដើម្បីតែផលប្រយោជន៍ផ្ទាល់ខ្លួន ហ៊ានទៅកុហកប្រជាពលរដ្ឋ ឬសន្យាជាមួយពលរដ្ឋ ហើយបែជាធ្វើមិនបាន ពិសេសអ្វីដែលសំខាន់នោះ គឺការរក្សាចំណងសាមគ្គីភាពដើម្បីបម្រើប្រជាពលរដ្ឋឱ្យបានកាន់តែល្អប្រសើរឡើងថែមទៀត។
ការលើកឡើងបែបនេះ របស់ឯកឧត្តមអភិបាលខេត្តបានធ្វើឡើងក្នុងពិធីចុះជួបសំណេះសំណាលជាមួយក្រុមប្រឹក្សាស្រុក ឃុំ ក្នុងស្រុកជុំគិរី និងស្រុកឈូក នាឱកាសនៃពិធីបុណ្យកាន់បិណ្ឌ និងភ្ជុំបិណ្ឌ នៅថ្ងៃទី៥ ខែតុលា ឆ្នាំ២០២៣។
ឯកឧត្តម ម៉ៅ ធនិន បានថ្លែងទៅកាន់ក្រុមប្រឹក្សាស្រុក ឃុំ ទាំងអស់ សូមកុំដើម្បីតែផលប្រយោជន៍ផ្ទាល់ខ្លួន កុំដើម្បីតួនាទីខ្លួនឯង កុំដើម្បីប្រាក់ខែប្រចាំថ្ងៃរបស់ខ្លួន ឬដើម្បីតែការយកឈ្នះគ្នាទៅវិញទៅមក ទៅភូតភរប្រជាពលរដ្ឋឱ្យប្រជាពលរដ្ឋគាំទ្រខ្លួន។ យើងអាចចូលមកកាន់មុខតំណែងជាថ្នាក់ដឹកនាំស្រុក ឃុំ គឺដោយសារតែមានការគាំទ្រពីសំណាក់ប្រជាពលរដ្ឋ ដែលជាម្ចាស់សំឡេងឆ្នោត ដូច្នេះយើងត្រូវតែមានតួនាទីក្នុងការបំរើពួកគាត់។ ម្យ៉ាងវិញទៀត កុំដើម្បីតែចង់ឈ្នះចាញ់គ្នារវាងបុគ្គល និងបុគ្គល ហើយនាំគ្នាទៅសន្យាជាមួយពលរដ្ឋហើយធ្វើមិនបាន ដែលបណ្តាលឱ្យពលរដ្ឋមានការអាក់អន់ប្រពន់ចិត្ត។ ដូច្នេះហើយ មានតែការរក្សានូវចំណងសាមគ្គីភាព រក្សាឱ្យបាននូវតម្លៃពិតដែលប្រជាពលរដ្ឋក្នុងមូលដ្ឋានត្រូវការ រក្សាឱ្យបាននូវតម្លៃពិតជាមនុស្សដែលពលរដ្ឋចង់បាននោះទើបជាការតបស្នងសងគុណប្រជាពលរដ្ឋដែលបានបោះឆ្នោតគាំទ្រ។
ទន្ទឹមនេះ ឯកឧត្តមអភិបាលខេត្តកំពត ក៏បានបញ្ជាក់ដែរថា ការចុះសំណេះសំណាល និងសាកសួរសុខទុក្ខក្រុមប្រឹក្សាក្រុង-ស្រុកទាំង៩ ឃុំ-សង្កាត់ទាំង៩៣ ក្នុងខេត្តកំពត នាឱកាសបុណ្យកាន់បិណ្ឌ និងភ្ជុំបិណ្ឌនេះ គឺជាការយកចិត្តទុកដាក់ ពីថ្នាក់ដឹកនាំ និងដើម្បីផ្តល់នូវសេចក្តីស្រឡាញ់រាប់អានគ្នាក្នុងនាមគ្រួសារតែមួយ ដែលកន្លងមកក្រុមប្រឹក្សាទាំងអស់ បានលះបង់កម្លាំងកាយចិត្តក្នុងការបម្រើប្រជាពលរដ្ឋក្នុងមូលដ្ឋានបានយ៉ាងល្អ៕
