ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានគូសបញ្ជាក់ថា សេរីភាពសារព័ត៌មានកម្ពុជា មិនឋិតនៅលើបបូរមាត់របស់បុគ្គល ឬក្រុមណាមួយទេ ជាពិសេសសកម្មភាពដែលមានចរិត និងរបៀបវារៈនយោបាយ ចំពោះមន្ត្រីរបស់កម្ពុជា គឺមិនមែនអង្គុយស្រមើលស្រមៃធ្វើរបាយការណ៍ឱ្យក្លាយជាកំហុសនោះទេ។ របាយការណ៍ស្តីពីស្ថានភាពសេរីភាពសារព័ត៌មាននៅកម្ពុជា ឆ្នាំ២០២៥ គឺបានបញ្ជាក់យ៉ាងច្បាស់ថា ជារបាយការណ៍មួយដែលខ្មែរ និយាយដោយខ្លួនឯង មិនមែនបរទេសមកនិយាយជំនួសនោះទេ។
ឯកឧត្តមរដ្ឋមន្ត្រី នេត្រ ភក្ត្រា បានលើកឡើងថា កម្ពុជាជានិច្ចកាលតែងតែរងនូវភាពអយុត្តិធម៌ពីរបាយការណ៍អង្គការអន្តរជាតិមួយចំនួន ដែលចេញផ្សាយទាក់ទងទៅនឹងស្ថានភាពសិទ្ធិមនុស្ស សេរីភាពការបញ្ចេញមតិ និងសេរីភាពសារព័ត៌មាន កម្ពុជាចាំបាច់ ត្រូវបានរបាយការណ៍មួយដែលឆ្លុះបញ្ចាំងពីគ្រប់មជ្ឈដ្ឋានទាំងអស់ ដើម្បីបង្ហាញស្ថានភាពសេរីភាពសារព័ត៌មានក្នុងប្រទេសរបស់ខ្លួន។
ក្នុងឱកាសធ្វើសន្និសីទសារព័ត៌មាន ស្តីពីការផ្សព្វផ្សាយរបាយការណ៍ «ស្ថានភាពសេរីភាពសារព័ត៌មាននៅកម្ពុជា ឆ្នាំ២០២៥» នារសៀលថ្ងៃទី៣០ ខែមេសា ឆ្នាំ២០២៥, ឯកឧត្តមរដ្ឋមន្ត្រី នេត្រ ភក្ត្រា បានថ្លែងយ៉ាងដូច្នេះថា៖ «ខ្ញុំខ្លាចតែអ្នកដែលគាត់វាយតម្លៃ ឬលើកឡើងពីសេរីភាពសារព័ត៌មាន នៅកម្ពុជា គឺមិនគ្រាន់តែនៅលើបបូរមាត់ទេ តែការពិតប្រហែលគាត់អត់មានឯកសារ ឬភស្តុតាងណាមួយបញ្ជាក់ឱ្យច្បាស់ ដូចអ្វីដែលក្រសួងព័ត៌មានបានធ្វើផង តែអាចត្រឹមតែអង្គុយសរសេរស្រមើលស្រមៃ ហើយវាយតម្លៃជុំវិញគ្នាឯងតែ២ ឬ៣នាក់ នោះគឺជាកំហុសរឿងឆ្គង»។
ឯកឧត្តមរដ្ឋមន្ត្រី នេត្រ ភក្ត្រា បានបន្ថែមថា កម្ពុជា ជារើយៗ ត្រូវបានបរទេស និងក្រុមជនមួយចំនួនតូចដែលទទួលបានជំនួយពីម្ចាស់ជំនួយរបស់ខ្លួន សរសេរវាយប្រហារ លាបពណ៌ នៅក្នុងកម្រិតនៃរបៀបវារៈនយោបាយរបស់ពួកគេ ក៏ប៉ុន្តែ កម្ពុជា គឺរបស់កម្ពុជា។ កម្ពុជាពិត គឺប្រជាជននៅក្នុងប្រទេសបានដឹងច្បាស់លាស់នៃស្ថានភាពពិតរបស់ខ្លួន។
ឯកឧត្តមរដ្ឋមន្ត្រីក្រសួងព័ត៌មាន បានថ្លែងថា ស្ថានភាពពិតនៃសេរីភាពសារព័ត៌មាននៅកម្ពុជា គឺស្ថិតនៅក្នុងរបាយការណ៍ តែមិនមែនស្ថិតនៅលើបបូរមាត់ របស់មន្ត្រីរដ្ឋាភិបាល និយាយតាមតែចិត្តង់នោះទេ របាយការណ៍ដែលចេញដោយក្រសួងព័ត៌មាន គឺឈរនៅលើការពិត ឈរនៅលើវិធីសាស្ត្រវិទ្យាសាស្ត្រ និងឈរលើមូលដ្ឋាននៃចម្លើយដែលផ្តល់ពីអ្នកសារព័ត៌មាន ដែលត្រូវបានជ្រើសរើសយ៉ាងពិតប្រាកដ ពីតំណាងអ្នកសារព័ត៌មានទូទាំងប្រទេស បានឆ្លើយនឹងកម្រងសំណួរស្តីពីសេរីភាពសារព័ត៌មាននៅកម្ពុជា សម្រាប់ឆ្នាំ២០២៥ ហើយលទ្ធផលដែលបានមកនេះ គឺជាលទ្ធផលពិតប្រាកដ ដែលកម្ពុជាត្រូវតែមានរបាយការណ៍ខ្លួនឯង។
«ខ្ញុំសូមជម្រាបជូនថា មន្ត្រីខ្មែររបស់យើង គឺមានសមត្ថភាពគ្រប់គ្រាន់ ដើម្បីធ្វើរបាយការណ៍ពីស្ថានភាពសេរីភាពសារព័ត៌មាននៅកម្ពុជា ដោយមិនចាំបាច់មានជំនួយពីបរទេសទេ របាយការណ៍នេះជាស្នាដៃរបស់មន្ត្រីខ្មែរ ជាកូនខ្មែរ ពីព្រោះកូនខ្មែររបស់យើងមកដល់ម៉ោងនេះ គឺមានសមត្ថភាព ពេញលេញហើយ»។ នេះជាការលលើកឡើងបន្ថែមរបស់រដ្ឋមន្ត្រីក្រសួងព័ត៌មាន។
ជាមួយគ្នានេះដែរ ឯកឧត្តមរដ្ឋមន្ត្រី នេត្រ ភក្ត្រា បានបន្តថា យើងមិនត្រូវរងចាំពឹងលើជំនួយបរទេសនោះទេ ពីព្រោះប្រជាពលរដ្ឋ និងមន្ត្រីខ្មែរ គឺត្រូវរួមគ្នាកសាងកម្ពុជា របស់យើងទៅជាប្រទេសដែលមានមោទនភាព ជាសង្គមរស់រវើក ប្រជាជនមានសមត្ថភាព។ ជាក់ស្តែងតាមរយៈរបាយការណ៍ស្តីពីស្ថានភាពសេរីភាពសារព័ត៌មាននៅកម្ពុជា ឆ្នាំ២០២៥ ដែលស្រាវជ្រាវ កងក្រងដោយមន្ត្រីខ្មែរ វាជាមោទនភាព។ ក្រសួងព័ត៌មាន គឺមិនមានអ្នកជំនាញការ ឬទីប្រឹក្សាជាជនជាតិបរទេសមកជួយលើការងារផ្នែកព័ត៌មាន និងសោតទស្សន៍នោះទេ ពោលគឺមន្ត្រីខ្មែរបានប្រឹងប្រែងធ្វើការងារដោយខ្លួនឯង ដូច្នេះ ចំណុចនេះបានបង្ហាញពីសមត្ថភាពពេញលេញរបស់មន្ត្រីខ្មែរ ដែលទទួលបានការបណ្តុះបណ្តាលក្នុងក្របខ័ណ្ឌនៃដំបូលសុខសន្តិភាព ស្ថិរភាពនយោបាយពេញលេញ ដែលបានផ្តល់ឱកាសដល់កូនខ្មែរអាចសិក្សាស្រាវជ្រាវ រហូតយកចំណេះដឹងទាំងនេះមកបម្រើប្រជាជន និងប្រទេសជាតិ។
ជាមួយគ្នានេះ ចំពោះកិច្ចការស្ទង់មតិនេះ ត្រូវបានឯកឧត្តមរដ្ឋមន្ត្រី នេត្រ ភក្ត្រា បានបញ្ជាក់ថា ធ្វើឡើងដោយមន្ត្រីរបស់ក្រសួងព័ត៌មានផ្ទាល់ ខណៈដែលអ្នករៀបចំធ្វើកិច្ចការងារទាំងនេះ គឺមានសមត្ថភាពគ្រប់គ្រាន់ ដោយមិនចាំបាច់មានជំនួយពីបរទេសនោះទេ។ របាយការណ៍ស្តីពី «ស្ថានភាពសេរីភាពសារព័ត៌មាននៅកម្ពុជា ឆ្នាំ២០២៥» គឺជាការផ្តោតទៅលើអ្វីដែលជាស្ថានភាពពិតប្រាកដ នៅក្នុងប្រទេសកម្ពុជា ខណៈដែលកម្ពុជាគឺមានរបៀបរបប នៃការគ្រប់គ្រងរបស់កម្ពុជា មិនអាចធ្វើការប្រៀបធៀបកម្ពុជា ទៅបណ្តាប្រទេសផ្សេងៗ ហើយមានតែប្រជាជនកម្ពុជា ជាពិសេសអ្នកសារព័ត៌មាន ស្ថិតក្នុងវិស័យព័ត៌មាន ដឹងច្បាស់ តាមរយៈការស្ទង់មតិរកឃើញថាមានរហូតទៅដល់ ៨១.០៤% បាននិយាយថា សេរីភាពសារព័ត៌មាន នៅកម្ពុជាមានភាពល្អប្រសើរ។
