រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ដែលទើបចូលកាន់តំណែង បានប្ដេជ្ញាទប់ស្កាត់ និងដោះស្រាយការសាងសង់ណា ដែលរំលោភច្បាប់ធ្វើឲ្យប៉ះពាល់ដល់សណ្តាប់ធ្នាប់សុវត្ថិភាពសាធារណៈ ។ ការប្តេជ្ញាបានធ្វើនៅរសៀលថ្ងៃ៥ ខែមេសានេះ ក្នុងពិធីផ្លាស់ប្ដូរមុខតំណែង ដោយរដ្ឋមន្ត្រីក្រសួង រៀបចំដែនដីនគរូបនីយកម្ម និងសំណង់ ឯកឧត្តមទេសរដ្ឋមន្ត្រី ជា សុផារ៉ា ចូលកាន់តំណែងជំនួស ឯកឧត្តមទេសរដ្ឋមន្ត្រី អ៊ឹម ឈុនលឹម ដែលត្រូវទៅកាន់តំណែងផ្សេង ។ ពិធីផ្ទេរតំណែងថ្ងៃនេះ បានប្រព្រឹត្តក្រោមអធិបតីភាព សម្ដេចក្រឡាហោម ស ខេង ។
ឯកឧត្តមទេសរដ្ឋមន្ត្រី ជា សុផារ៉ា បានមានប្រសាសន៍ ប្ដេជ្ញាជំរុញដោះស្រាយការកកស្ទះក្នុងការចុះបញ្ជីដីធ្លី និងការចុះបញ្ជីដីធ្លីសហគមន៍ជនជាតិដើមភាគតិច ។ ឯកឧត្តមរដ្ឋមន្ត្រីថ្មី បានប្តេជ្ញាទប់ស្កាត់ការទន្ទ្រានកាន់កាប់ដីរដ្ឋ… ការរំលោភបំពានកម្មសិទ្ធិរបស់ប្រជាពលរដ្ឋ… ជួយដោះស្រាយរកយុត្តិធម៌ដល់ភាគីពាក់ពន្ធ័ ដើម្បីជំនឿជឿជាក់ក្នុងការដឹកនាំរបស់រាជរដ្ឋាភិបាលកម្ពុជា… ទប់ស្កាត់និងដោះស្រាយ ការសាងសង់ដែលរំលោភច្បាប់ ដែលធ្វើឲ្យប៉ះពាល់ដល់សណ្ដាប់ធ្នាប់ សុវត្ថិភាពសាធារណៈ ក៍ដូចជាការជម្រុញសោភណ័ភាព និងបរិស្ថានផងដែរ ។