ការអនុវត្តកម្មវិធីលើទឹកចិត្តដល់ធុរជន ដែលមានអនុលោមភាពខ្ពស់ គឺជាផ្នែកមួយ នៃការអនុវត្តគោលនយោបាយកិច្ចសម្រួលពាណិជ្ជកម្ម របស់រាជរដ្ឋាភិបាលកម្ពុជា។
កម្មវិធីនេះត្រូវបានអនុវត្តជាផ្លូវការចាប់ពីថ្ងៃទី២៣ ខែមិថុនា ឆ្នាំ២០១៤ ក្នុងពិធីប្រគល់វិញ្ញាបនបត្រសមាជិកក្រុមធុរជនល្អបំផុត នៅអគ្គនាយកដ្ឋានគយនិង រដ្ឋាករកម្ពុជា។ គិតត្រឹមខែកក្កដា ឆ្នាំ២០១៥ ក្រុមហ៊ុនចំនួន១៣ ត្រូវបានអគ្គនាយកដ្ឋានគយ និងរដ្ឋាករកម្ពុជា(អគរ) សម្រេចផ្តល់ជាបណ្តោះអាសន្ននូវសមាជិកភាពក្រុមធុរជនល្អបំផុត។ ជាជំហានបន្ត អគរ នឹងពិនិត្យលទ្ធភាពធ្វើការជ្រើសរើសសមាជិកបន្ថែមទៀត និងឈានទៅអនុវត្តពេញលេញនូវកម្មវិធីប្រតិបត្តិករសេដ្ឋកិច្ចមានការអនុញ្ញាត (Authorized Economic Operator-AEO) តាមជំហាននៃយុទ្ធសាស្ត្រ និងកម្មវិធីកំណែទម្រង់និងទំនើបកម្មឆ្នាំ២០១៤-២០១៨ របស់ខ្លួន។
កញ្ចប់លក្ខណៈវិនិច្ឆ័យ
ដើម្បីអាចក្លាយជាធុរជនល្អបំផុតនៅកម្ពុជា ធុរជន ឬបុគ្គលពាក់ព័ន្ធត្រូវមានលក្ខណៈសម្បត្តិដូចខាងក្រោម៖
• ¬ស្ថិតក្នុងបញ្ជីធុរជនចំណាត់ថា្នក់លេខ១ (Rank 1) នៃប្រព័ន្ធគ្រប់គ្រងភាពជឿជាក់លើធុរជននាពេលដាក់ពាក្យស្នើសុំ។
• ជានីតិបុគ្គលដែមានដើមទុនចុះបញ្ជីមិនតិចជាង ១ពាន់លានរៀល
• មិនធ្លាប់ប្រព្រឹត្តបទល្មើសគយធ្ងន់ធ្ងរដោយចេតនាក្នុងរយៈពេល ៣ឆ្នាំចុងក្រោយនេះ គិតត្រឹមថ្ងៃដាក់ពាក្យស្នើសុំ។
• មិនធ្លាប់ជំពាក់បំណុលពន្ធអាករគយហួសកាលកំណត់ ឬ បំណុលផ្សេងទៀតដែលមិនអាច សងបាន។
• អនុវត្តបានពេញលេញនូវកាតព្វកិច្ចគ្រប់គ្រងឯកសារ បញ្ជីគណនេយ្យ កំណត់ត្រា និងព័ត៌មាន ផ្សេងទៀតពាក់ ព័ន្ធនឹងការនាំចេញនាំចូលតាមបទប្បញ្ញត្តិជាធរមាន
• ត្រូវតែជាសាមាជិកនៃសហគមន៍ធុរកិច្ចណាមួយ ដែលមានការអនុញ្ញាត និងត្រូវមានការបញ្ជាក់ពី ប្រធានសហគមន៍ធុរកិច្ចនោះ ពីភាពរឹងមាំនៃស្ថានភាពហិរញ្ញវត្ថុនិងអនុលោមភាពរបស់ធុរជន។
• ត្រូវមានទំហំពាណិជ្ជកម្មនាំចេញ នាំចូលប្រចាំឆ្នាំ មិនតិចជាង២លានដុល្លារអាមេរិក និងមានកាតព្វកិច្ចធ្វើរបាយការតាមទម្រង់នានា ដែលកំណត់ដោយអង្គភាពគ្រប់គ្រងធុរជនល្អបំផុតនៃ អគរ ។
កញ្ចប់ប្រព្រឹត្តកម្មលើកទឹកចិត្ត
សម្រាប់ជំហានដំបូងនៃការអនុវត្តសាកល្បង (Pilot Implementation stage) ធុរជនល្អបំផុតនៅកម្ពុជា អាចទទួលបាននូវប្រព្រឹត្តកម្មអនុគ្រោះនានាដូចខាងក្រោម។
• អាទិភាពមិនរង់ចាំតាមជួរលំដាប់លំដោយ តាមគោលការណ៍មកមុនផ្តល់សេវាមុន (First-in First-out principle)ទាំងក្នុងដំណាក់កាលដាក់ឯកសារ ដំណាក់កាលត្រួតពិនិត្យទំនិញឬ ឯកសារ និងដំណាក់អនុញ្ញាតឲ្យយកទំនិញចេញ តាមរូបភាពរហ័សនិងលទ្ធភាព ដែលអាចធ្វើទៅបាន។
• អាចទទួលបាននូវការអនុញ្ញាតឲ្យជំពាក់បែបបទគយ ដោយលើកលេងការតម្កល់និមុត្តិធានា។
• ការលើកលែងនីតិវិធីនៃការផ្ទៀងផ្ទាត់ជាមុន នូវតម្លៃគិតពន្ធគយនិងវិញ្ញាបនបត្រប្រភពដើមទំនិញ។
• ការលើកលែងកាតព្វកិច្ច អមលិខិតអនុញ្ញាតដឹកជញ្ជូនកាតព្វកិច្ចត្រាពន្ធគយ និងការកាត់បន្ថយកាតព្វកិច្ចឆ្លងម៉ាស៊ីនស្កែន។
• លទ្ធភាពនៃការបំពេញបែបបទគយមុនពេលទំនិញមកដល់ (Pre-arrival Clearance) និងការបំពេញបែបបទគយចុងទី (Destination Clearance) ក្រោមរបបគយឆ្លងកាត់ ជាដើម។
ការដាក់ពាក្យស្នើសុំជាសមាជិក
ធុរជនដែលមានលក្ខណៈសម្បត្តិគ្រប់គ្រាន់ ដើម្បីក្លាយជាសមាជិកក្រុមធុរជនល្អបំផុត ត្រូវដាក់ពាក្យ ស្នើសុំមកអគ្គនាយគយនិងរដ្ឋាករកម្ពុជា អមភ្ជាប់មកជាមួយនូវឯកសារដូចខាងក្រោម៖
• វិញ្ញាបនបត្រចុះបញ្ជីពាណិជ្ជកម្ម និងលក្ខន្តិកៈក្រុមហ៊ុន អមបញ្ជីម្ចាស់ភាគហ៊ុននាថ្ងៃស្នើសុំ។
• ការប្រកាសពីស្ថានភាពហិរញ្ញវត្ថុ (Financial Statement) នាពីរឆ្នាំចុងក្រោយ (បើមានការតម្រូវ)។
• លិខិតបញ្ជាក់ទទួលស្គាល់អនុលោមភាពពីសហគមន៍ធុរកិច្ចពាក់ព័ន្ធ
• វិញ្ញាបនបត្រចុះបញ្ជីអាករលើតម្លៃបន្ថែមនិង/ ឬបណ្ណប៉ាតង់ ឬលិខិតអនុញ្ញាតប្រហាក់ប្រហែល។
• ច្បាប់ចម្លងនៃអត្តសញ្ញាណបណ្ណ ឬ ឯកសារប្រហាក់ប្រហែលរបស់ថ្នាក់ដឹកនាំក្រុមហ៊ុន។
• ទំហំនៃការនាំចូលការនាំចេញ និងការលក់ចូលទីផ្សារក្នុងស្រុកនាឆ្នាំចុងក្រោយ៕