សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា រាជរដ្ឋាភិបាលតែងបានផ្ដល់លទ្ធភាព និងលើកទឹកចិត្តឱ្យមានចលនាកៀរគរប្រមូលប្រភពធនធាន ដើម្បីជំរុញការងារ ប្រយុទ្ធនឹងជំងឺគ្រុនចាញ់ឱ្យកាន់តែមានសកម្មភាពខ្លាំងក្លាថែមទៀត ឆ្ពោះទៅលុបបំបាត់ជំងឺនេះ ឱ្យបានតាមផែនការកំណត់ បើទោះជាបច្ចុប្បន្ននេះ ពិភពលោក រួមទាំងប្រទេសកម្ពុជា កំពុងប្រឈមនឹងវិបត្តិជំងឺកូវីដ-១៩ ក៏ដោយ។
យោងតាមសារលិខិតក្នុងឱកាសប្រារព្ធទិវាជាតិប្រយុទ្ធនឹងជំងឺគ្រុនចាញ់ នាថ្ងៃទី ២៥ ខែមេសា ឆ្នាំ២០២០ សម្ដេចតេជោ ហ៊ុន សែន បានថ្លែងថា បច្ចុប្បន្ននេះ កម្ពុជា គ្មានអ្នកស្លាប់ដោយសារជំងឺគ្រុនចាញ់ទេ ប៉ុន្ដែភាគីពាក់ព័ន្ធមិនត្រូវភ្លេចខ្លួន ពីព្រោះជំងឺនេះនៅតែជាបន្ទុកដ៏ធ្ងន់មួយរបស់កម្ពុជា បើមិនទាន់លុបបំបាត់មេរោគគ្រុនចាញ់ ឱ្យអស់ពីក្នុងខ្លួន មូសដែកគោលញីនៅបន្ដមានវត្តមាន ពីសហគមន៍មួយ ទៅសហគមន៍មួយ ដដែល។ សម្ដេចតេជោបន្តថា បើតាមរបាយការណ៍របស់កម្មវិធីជាតិប្រយុទ្ធនឹងជំងឺគ្រុនចាញ់កម្ពុជា បានបង្ហាញថា កម្ពុជាលែងមានករណីស្លាប់ដោយសារ ជំងឺគ្រុនចាញ់ ចាប់ពីឆ្នាំ២០១៨ រហូតមកដល់ បច្ចុប្បន្ននេះ បាន ន័យថា សម្រេចបានជោគជ័យ៣ឆ្នាំ មុនគោលដៅគ្រោងទុក ឆ្នាំ២០២០។ ឆ្នាំ២០១៩ករណីឈឺជំងឺគ្រុនចាញ់ប្រភេទហ្វាល់ស៊ីប៉ារ៉ូម(ប្រភេទសន្ធំ) និងច្រមុះ មាន ៤,៩៩០ករណី គឺថយចុះ ៧២ភាគរយ បើប្រៀបធៀបឆ្នាំ២០១៨ មាន១៨, ០៥៧ករណី និងចំពោះករណីគ្រុនចាញ់ប្រភេទវីវ៉ាក់(ប្រភេទលាប់) ក៏មានការថយចុះ៣៩ភាគរយដែរ។
សម្ដេចតេជោបានគូសបញ្ជាក់ថា «ទោះបីយ៉ាងណាក៏ដោយ ក៏យើងមិនត្រូវភ្លេចខ្លួន ស្កប់ស្កល់ នឹងលទ្ធផលដែលយើងទទួលបាននោះទេ ព្រោះថា ជំងឺគ្រុនចាញ់នៅតែជាបន្ទុកដ៏ធ្ងន់មួយរបស់កម្ពុជា ហើយបើយើងមិនទាន់លុបបំបាត់ មេរោគគ្រុនចាញ់ឱ្យអស់ពីក្នុងខ្លួនមនុស្សគ្រប់ៗរូបទេនោះ សត្វមូសដែកគោលញីដែលនៅបន្ដមានវត្តមានក្នុងព្រៃ និងតំបន់ជុំវិញ នៅតែមានឱកាសខាំបឺតឈាមចម្លងមេរោគគ្រុនចាញ់ ពីមនុស្សម្នាក់ទៅមនុស្សម្នាក់ និងពីសហគមន៍ មួយទៅសហគមន៍មួយដដែល»។ សម្ដេចតេជោបន្ថែមថា ជំងឺគ្រុនចាញ់មិនត្រឹម តែធ្វើឱ្យប៉ះពាល់ដល់សុខភាព ចំណាយលុយកាក់តាមរយៈការចំណាយ ដោយផ្ទាល់លើការព្យាបាល ការខាតបង់ការងារ ការបាត់បង់ ផលិតភាព និងអាយុជីវិតប៉ុណ្ណោះទេ ប៉ុន្ដែថែមទាំងបង្កផល ប៉ះពាល់ជាអវិជ្ជមានដល់ ការអភិវឌ្ឍសង្គម-សេដ្ឋកិច្ច ដ៏ធ្ងនធ្ងរទៀត។តាមទស្សនាទាននេះ ពលរដ្ឋខ្មែរទាំងអស់គ្នាចាំ បាច់ណាស់ ត្រូវបន្ដយកចិត្តទុកដាក់លើបញ្ហាជំងឺគ្រុនចាញ់នេះ ដោយពលរដ្ឋមិនអាចលើ រំលងបានឡើយ។ ផ្ទុយទៅវិញ ប្រសិនបើពលរដ្ឋមានសុខភាពល្អ នឹងនាំឱ្យមានជីវភាពរនៅល្អប្រសើរ មានលទ្ធភាពខ្ពស់ លើការបង្កើនចំណេះដឹង បង្កើនផលិតភាពដែលនឹងនាំមកនូវភាពរីកចម្រើន សេចក្ដីថ្លៃថ្នូរ និងសុភមង្គល។ សម្ដេចតេជោបានគូសបញ្ជាក់ទៀតថា សមិទ្ធផលទាំងនេះកំពុងតែបង្ហាញឱ្យឃើញនូវសញ្ញាវិជ្ជមាន លើប្រសិទ្ធភាព និងគុណភាពខ្ពស់លើរាល់កិច្ចការអន្ដរាគមន៍របស់កម្ពុជា ឆ្លើយតបប្រយុទ្ធនឹងជំងឺគ្រុនចាញ់ ដើម្បីឈានទៅសម្រេចជោគជ័យបានទាំងស្រុង លើការលុបបំបាត់ជំងឺគ្រុនចាញ់គ្រប់ប្រភេទនា ឆ្នាំ២០២៥ និងក៏ជាបុព្វហេតុមួយក្នុងការចូលរួមចំណែកឈានទៅ សម្រេចគោលដៅអភិវឌ្ឍសហស្សវត្សកម្ពុជា។ ជាងនេះទៀត កម្ពុជាកំពុងអនុវត្តន៍អភិក្រម ការងារលុបបំបាត់ជំងឺគ្រុនចាញ់ ឆ្នាំ២០១៦-២០២០ ដែលជាផ្នែកមួយនៃផែនការយុទ្ធសាស្ដ្រជាតិលុបបំបាត់ ជំងឺគ្រុនចាញ់នៅកម្ពុជា ឆ្នាំ២០១១-២០២៥ ដែលជាផែនទីបង្ហាញផ្លូវ និងបង្កលក្ខណៈងាយស្រួលដល់ការប្រតិបត្តិជាក់ស្ដែងឈានឆ្ពោះទៅលុបបំបាត់ជំងឺគ្រុនចាញ់ទូទាំងប្រទេស។ ជាងនេះទៅទៀត សម្ដេចនាយករដ្ឋមន្ដ្រីក៏បាន អំពាវនាវឱ្យក្រសួង ស្ថាប័ន អាជ្ញាធរមូលដ្ឋាន គ្រប់លំដាក់ថ្នាក់ទាំងអស់ វិស័យឯកជមន អង្គការនានា ប្រព័ន្ធផ្សព្វផ្សាយព័ត៌មាន សហគមន៍ជាតិ និងអន្ដរជាតិ និងដៃគូអភិវឌ្ឍ ជាពិសេស ប្រជាជនគ្រប់រូប ត្រូវបន្ដចូលរួម និងគ្រាំទ្រដល់ បេសកម្មរបស់ក្រសួងសុខាភិបាល តាមផែនការយុទ្ធសាស្ដ្រជាតិលុបបំបាត់ជំងឺគ្រុនចាញ់នៅ កម្ពុជា ឆ្នាំ២០១១-២០២៥ ឲ្យទទួលបានជោគជ័យ។
គួរបញ្ជាក់ដែរថា ទិវាជាតិប្រយុទ្ធនឹងជំងឺគ្រុនចាញ់ និងទិវាគ្រុនចាញ់ពិភពលោកដែលនឹងប្រព្រឹត្ត ទៅនៅថ្ងៃទី២៥ ខែមេសា ឆ្នាំ២០២០ខាងមុខនេះ ក្រោមប្រធានបទ «គ្មានជំងឺគ្រុនចាញ់ ផ្ដើមចេញពីខ្ញុំ»។ទិវានេះ ប្រារព្ធឡើងក្នុងគោលបំណងជំរុញ និងបំផុសការយល់ដឹង និងយកចិត្តទុ កដាក់កាន់តែខ្ពស់បន្ថែមទៀត ក្នុងការលើកកម្ពស់សុខុមាលភាពសង្គម និងសំដៅរួមចំណែក ដល់ការថែរក្សាសុខភាពរបស់ប្រជាពលរដ្ឋ៕