សម្តេចតេជោនាយករដ្ឋមន្រ្តី ហ៊ុន សែន បានមានប្រសាសន៍អំពាវនាវ ការទប់ស្កាត់នយោបាយបែបទម្រង់ប៉ុលពត និងការរួបរួមគ្នាការពារសន្តិភាព ។ ប្រសាសន៍របស់សម្តេចបានធ្វើឡើងក្នុងទំព័រហ្វេសប៊ុកថ្ងៃទី២៤ ខែកុម្ភៈនេះ ដែលជាទិវារំលឹកខួប ៣៧ឆ្នាំ របស់សម្តេច អំឡុងពេលជួបជុំជាមួយនឹងភរិយា និងកូនប្រុស ក្រោយការបែកគ្នាប្រមាណ ២ឆ្នាំ ដើម្បីការងាររំដោះប្រទេសជាតិ ចេញផុតពីរបបកម្ពុជាប្រជាធិបតេយ្យ ។
សម្តេចតេជោសែន បានចាកចេញពីភរិយាដែលពរពោះជាង ៥ខែ នៅថ្ងៃទី២០ ខែមិថុនា ឆ្នាំ ១៩៧៧ ក្នុងការចេញទៅបង្កើតការតស៊ូរំដោះជាតិ ក្រោយមកសម្តេចបានជួបជាមួយនឹង សម្តេចកិត្តិព្រឹទ្ធបណ្ឌិត វិញនៅថ្ងៃទី២៤ ខែកុម្ភៈ ឆ្នាំ ១៩៧៩ ។
គួររំលឹកថា សម្តេចតេជោ ហ៊ុន សែន និងរណសិរ្សសាមគ្គីសង្គ្រោះជាតិ បន្ទាប់ពីបានដឹកនាំកងកម្លាំងតស៊ូរំដោះប្រទេសជាតិ ចេញផុតពីរបបកម្ពុជាប្រជាធិបតេយ្យខ្មែរក្រហម នៅថ្ងៃទី ៧មករា ឆ្នាំ ១៩៧៩ ហើយ… បានបន្តការដឹកនាំប្រទេស ដែលពេលនោះ ប្រឈមនឹងសង្គ្រាមស៊ីវិលផង… ប្រឆាំងការវិលត្រឡប់មកវិញ នូវរបបខ្មែរក្រហមប៉ុលពតផង និងប្រឈមការដាក់ទណ្ឌកម្មជាអន្តរជាតិអស់ប្រមាណ ១១ឆ្នាំ ផងដែរ ។
កិច្ចព្រមព្រៀងក្រុងប៉ារីសថ្ងៃ២៣ ខែតុលា ឆ្នាំ ១៩៩១ បើទោះបីជានាំមកនូវកម្លាំងអង្គការសហប្រជាជាតិជាងមួយម៉ឺននាក់ និងការចំណាយលុយប្រមាណ ២ពាន់លានដុល្លារអាមេរិក ក្នុងការរៀបចំអោយមានការបោះឆ្នោតសកលលើកដំបូងនោះក៏ដោយ ប៉ុន្តែសង្គ្រាមស៊ីវិលបង្កដោយក្រុមឧទ្ទាមខ្មែរក្រហម នៅតែបន្តនាពេលនោះ។ ប្រវត្តិសាស្ត្របានចារិកថា សម្តេចតេជោសែន ដែលមិនត្រឹមតែបានដឹកនាំកម្លាំងតស៊ូរំដោះជាតិ និងសង្គ្រោះប្រជាជនរស់រានមានជីវិតនៅថ្ងៃ ៧មករា ១៩៧៩ ប៉ុណ្ណោះទេ… សម្តេចថែមទាំងបន្តការដឹកនាំបំបាត់សង្គ្រាមស៊ីវិល និងបានធ្វើអោយប្រទេសមានសន្តិភាពពិតប្រាកដ នៅចុងឆ្នាំ ១៩៩៨ ថែមទៀតក្រោមនយោបាយឈ្នះៗ ។
ក្នុងហ្វេសប៊ុកដែលរំលឹកខួប ៣៧ឆ្នាំ ជួបជុំគ្រូសារសាឡើងវិញ សម្តេចបានមានប្រសាសន៍ថា យើងរួមគ្នាការពារសន្តិភាព ទប់ស្កាត់នយោបាយបែបទម្រង់ ប៉ុល ពត ក្នុងសម័យថ្មីវិលមកវិញជាដាច់ខាត ៕
